Қазақстандық боксшылар әлем кубогында кім кіммен жұдырықтасады?
Фото: kazsports.kz
Астанада бокстан өтетін Әлем кубогының үшінші кезеңінің жеребе тарту рәсімі өтті. Жекпе-жек сарайында өтетін жарыста бірінші болып 70 келіде сынға түсетін Абылайхан Жүсіпов рингке ертең күндізгі сессияда шығады, деп хабарлайды Pin-UpSport.kz.
Бұл додада еліміздің мықтылары түгел дерлік бақ сынайды. 50 келіде Санжар Тәшкенбай жапон боксшысымен, ал 55 келіде Сабырхан Махмұд Оңтүстік Корея спортшысымен кездеседі. Сонымен қатар, Серік Теміржанов (60 келі), Ертуған Зейнуллиннов (65 келі), Сабыржан Аққалықов (75 келі), Нұрбек Оралбай (80 келі) мен Бекзат Нұрдәулетов (85 келі) де алғашқы жекпе-жектерін өткізеді. +90 келіде Айбек Оралбай Доминикан Республикасының өкілімен жұдырықтасады.
90 келіде Сағындық Тоғамбай ширек финалға тікелей шықты. Ол енді Италия мен АҚШ боксшылары арасындағы кездесудің жеңімпазын күтеді. Айта кетейік, италиялық спортшы Азиз Аббес Мухийдин — әлем чемпионатының екі дүркін күміс жүлдегері.
Жарыстың күндізгі сессиясы сағат 14:00-де, ал кешкі бәсекелер 19:00-де басталады.
