Бек Нұрмағамбет кезекті жекпе-жегін АҚШ-та өткізеді
Бек Нурмаганбет Фото: Getty Images
Кәсіпқой бокстан еш жеңілмеген отандасымыз Бек Нұрмағамбет (13-0, 10 KO) кезекті жекпе-жегін АҚШ-тың Пенсильвания штатындағы Филадельфия қаласында өткізеді. Жекпе-жек жергілікті уақытпен 5 сәуірде өтеді, ал Қазақстанда оны 6 сәуірдің таңында көруге болады.
Бұл жолы Бектің қарсыласы Коста-Рика елінен келген Энкарнасион Диас болмақ. Оның рекорды — 20 жеңіс, 5 жеңіліс, 11 қарсыласын нокаутқа түсірген. Екеуінің кездесуі жартылай ауыр салмақта өтеді, алты раундқа жоспарланған. Айта кетейік, Диас биылғы жылы тағы бір қазақстандық боксшы Али Ахмедовпен кездесіп, екінші раундта техникалық нокаутпен жеңілген еді.
Бек өткен жекпе-жегін өткен жылдың қазанында Калифорниядағы Сан-Хасинто қаласында өткізіп, мексикалық Хоакин Мурьету Лусионы (13-14, 11 KO) екінші раундта сұлатып түсірген. Осылайша, Нұрмағамбет жеңіс жолын жалғастырып келеді.
Айта кетерлігі, Бек бұған дейін екінші орта салмақтағы абсолют чемпион Сауль «Канело» Альвареспен бір залда жаттығып, тіпті оның спарринг-серіктесі де болған. Бұл тәжірибе оның кәсіби дамуына үлкен ықпал еткені сөзсіз.
