Асу Алмабаев: «Капені жеңсем, титулдық жекпе-жекке бір қадам жақындаймын»
Асу Алмабаев
Қазақстандық UFC файтері Асу Алмабаев алдағы демалыста Манел Капені жеңсе, чемпиондық белбеуге бір табан жақындайтынына сенімді.
Алмабаев пен Капе UFC Vegas 103 турнирінің басты жекпе-жегінде кездеседі. Турнир 1 наурызда Лас-Вегаста өтеді (Қазақстан уақытымен 2 наурыз таңертең).
— Бұл мен үшін керемет мүмкіндік. Бастапқыда басқа қарсыласқа дайындалып жүрген едім, бірақ кард өзгеріп, басты жекпе-жекке шығу бұйырды. Бұл өзімді көрсетуге, керемет жекпе-жек өткізуге және титулға жақындай түсуге берілген үлкен мүмкіндік. Ең маңыздысы — мықты өнер көрсетіп, жеңіске жету, — деді Асу UFC-ге берген сұхбатында.
Оның айтуынша, бұл кездесуге дайындық барысында қарсыласы бірнеше рет өзгерген. Алғашында Стив Эрцегке қарсы жаттыққан, алайда ол жекпе-жектен бас тартты. Кейін бразилиялық файтер ұсынылған. Ал Брэндон Ройвал жарақатына байланысты турнирден шығып қалған соң, Алмабаев менеджеріне: «Маған осы мүмкіндікті беріңдер!» деп, басты жекпе-жекке сұранған.
— Бұл бес раундтық жекпе-жек, мен өзімнің барлық шеберлігімді көрсетуге дайынмын. Сондай-ақ, бұл кездесудің титулдық үміткерді анықтайтын жекпе-жек болуы мүмкін екенін естідім. Егер жеңсем, чемпиондық белбеуге таласатын үміткерлердің қатарына қосыламын. Сондықтан бұл жекпе-жек мен үшін өте маңызды, — деді Алмабаев.
Айта кетейік, қазір UFC-дің ең жеңіл салмақтағы чемпионы бразилиялық Алешандре Пантожа.
Айбар Рысдаулет
Мейірім Нұрсұлтанов WBC чемпионымен жұдырықтасуы мүмкін
Бауыржан Исламхан «Тұранға» ауысады