Шон Стрикленд UFC-тен кетіп, кәсіпқой боксқа ауысуды ойлап жүр
Америкалық файтер Шон Стрикленд кәсіпқой боксқа ауысқысы келетінін мәлімдеді. Спортшы аралас жекпе-жектегі ауыр жаттығулардан, жарақаттардан және UFC келісімшартының қаржылық шарттарынан шаршағанын айтты, деп хабарлайды Pin-UpSport.kz.
Стрикленд ММА-ға деген бұрынғы қызығушылығы жоғалғанын және бокста бағын сынағысы келетінін жеткізді. Ол шап тұсындағы жарақаты мен акромиалды-бұғана буынының шығуын атап өтіп, боксты физикалық тұрғыдан жеңілірек әрі табыстырақ спорт түрі деп санайтынын айтты.
Америкалық Zuffa Boxing турниріне қатысып, салмақ дәрежесін өзгертуді және UFC алдындағы қалған міндеттемелерін орындауды жоспарлап отыр. Кейін мансабын толығымен боксқа арнамақ. Стрикленд ықтимал қарсыластарының қатарында Джейк Полды атап, жаңа спорт түрінде чемпиондық атаққа таласуға дайын екенін мәлімдеді.
Сонымен қатар файтер UFC ұйымының қаржылық саясатын сынға алды. Оның пікірінше, спортшылар мансабына жылдарын арнап, ауыр жарақаттарға қарамастан жарысты жалғастыруға мәжбүр, ал ұйым олардың еңбегіне жеткілікті ақы төлемейді. Стрикленд кәсіпқой ММА-дегі мансабын 2008 жылы бастады, ал UFC-де 2014 жылдан бері өнер көрсетіп келеді. 2023 жылғы қыркүйекте Исраэль Адесаньяны жеңіп, орта салмақта алғаш рет чемпиондық белбеуді иеленді. Берілген мәлімет бойынша, оның ММА-дегі рекорды – 31 жеңіс және жеті жеңіліс.
