Нұрбек Оралбай Азия ойындарын жеңіспен бастады
Қазақстандық боксшы Нұрбек Оралбай Жапонияның Айти префектурасы мен Нагоя қаласында өтіп жатқан 2026 жылғы Азия ойындарындағы алғашқы жекпе-жегінде жеңіске жетті, деп хабарлайды Pin-UpSport.kz. 90 келіге дейінгі салмақтағы 1/8 финалда ол Ауғанстан өкілі Силаб Ноориді төрешілердің бірауыздан қабылдаған шешімімен жеңді.
Оралбай жекпе-жектің алғашқы раундтарынан бастап кездесуді бақылауда ұстады. Бірінші раундта үш төреші қазақстандық боксшыға 10:9 есебімен басымдық берсе, тағы екі төреші 10:8 деп бағалады. Екінші раундта да барлық төреші Оралбайдың пайдасына 10:9 есебін тіркеді. Қорытынды төрешілер хаттамасында 30:27, 30:26, 30:27, 30:26 және 29:28 деген есептер көрсетілді.
Осы жеңістен кейін Нұрбек Оралбай Азия ойындарының ширек финалына жолдама алды. Қазақстандық боксшы келесі кезеңде 2025 жылғы әлем чемпионы, Өзбекстан өкілі Турабек Хабибуллаевпен кездеседі. Екі боксшы 2026 жылы Қытайдың Гуйян қаласында өткен әлем кубогының екінші кезеңінде кездескен. Сол жекпе-жекте төрешілер шешімімен Хабибуллаев жеңіске жеткен болатын.
Нұрбек Оралбай бұған дейін 80 келіге дейінгі салмақта өнер көрсетіп, Париж-2024 Олимпиадасында күміс медаль жеңіп алған. 2026 жылы ол 85 келіге дейінгі салмақта Азия чемпионы атанып, кейін 90 келіге дейінгі жаңа салмақ дәрежесіне ауысты. Оралбай – Хабибуллаев арасындағы ширек финалдық жекпе-жек 28 қыркүйекте өтеді.
