Астана алғаш рет жағажай волейболынан ересектер арасындағы Қазақстан чемпионатын қабылдайды
Астана алғаш рет жағажай волейболынан ересектер арасындағы Қазақстан чемпионатын қабылдайды, деп хабарлайды Pin-UpSport.kz. Ұлттық чемпиондық атақ үшін еліміздің сегіз өңірінен келген 14 ерлер және әйелдер жұбы бақ сынайды.
Жарыс 11-13 қыркүйек аралығында «Дәулет» теннис орталығының жағажай волейболына арналған алаңдарында өтеді. Турнир қорытындысы бойынша ерлер мен әйелдер арасында Қазақстанның үздік жұптары анықталады.
Бұл жағажай волейболынан ересектер арасындағы төртінші Қазақстан чемпионаты болмақ. Сонымен қатар жарыс тарихында алғаш рет елордада ұйымдастырылады.
Чемпионатты Қазақстан волейбол федерациясы, Спорт және дене шынықтыру істері комитеті, Астана қаласының әкімдігі және қалалық волейбол федерациясы ұйымдастырады. Турнир «Самұрық-Қазына» қоры мен туризм және спорт индустриясын қолдау қорының қолдауымен өтеді.
