Карпович «Астанадан» жеңілген ойынды бапкерлік мансабындағы ең ауыр матч деп атады
«Елімай» бас бапкері Андрей Карпович ҚПЛ-ның 25-турында «Астанаға» 0:4 есебімен жеңілгеннен кейін жанкүйерлерден, клуб басшылығынан, демеушілер мен серіктестерден кешірім сұрады, деп хабарлайды Pin-UpSport.kz. Сонымен қатар маман матч соңына дейін командасын қолдаған семейлік жанкүйерлерге алғысын білдірді.
Карпович бұл кездесуде командасының өте әлсіз ойын көрсеткенін мойындады. Оның айтуынша, бапкерлік қызметіндегі осы уақытқа дейінгі ең сәтсіз әрі ұятты ойындардың бірі болған. Маман болған жағдай үшін жауапкершілікті өз мойнына алып, бұл жеңілісті футболшылармен бірге өткеретінін айтты.
«Астана» сапалы әрі мықты команда екенін атап өткен Карпович, соған қарамастан «Елімайдың» өз деңгейінде ойнай алмағанын жеткізді. Бас бапкер команданың мінезі, психологиялық дайындығы және басқа да аспектілер бойынша осы маусымдағы ең әлсіз ойынын өткізгенін айтты.
Кездесу 6 қыркүйекте «Астана Аренада» өтті. Иван Башич дубль жасаса, Марин Томасов пен Рамазан Каримов бір-бір голдан соқты. 23 ойыннан кейін «Елімай» 32 ұпай жинап, ҚПЛ-дағы турнир кестесінде алтыншы орында тұр.
