Қазақстандық боксшы әлем кубогының финалына шыға алмады
Қазақстандық боксшы Дина Исламбекова Қытайдың Гуйян қаласында өтіп жатқан World Boxing әлем кубогындағы жарыс жолын аяқтады, деп хабарлайды Pin-UpSport.kz. Жартылай финалда ол Өзбекстан өкіліне есе жіберіп, финалға шыға алмады.
Гуйяндағы турнирге әлемнің 44 елінен спортшылар қатысуда. Қазақстан мен Өзбекстан боксшылары арасындағы кездесулер дәстүрлі түрде үлкен қызығушылық тудырады. Бұл жолы екі елдің өкілдері әйелдер арасындағы 80 келіден жоғары салмақ дәрежесінде өзара мықтыны анықтады.
Финал жолдамасы сарапқа салынған кездесуде Дина Исламбекова өзбекстандық Олтина Сотимбоевамен қолғап түйістірді. Үш раунд қорытындысы бойынша төрешілер жеңісті бірауыздан 5:0 есебімен Өзбекстан спортшысына берді. Осылайша Сотимбоева финалға жолдама алса, қазақстандық боксшы жарысты жартылай финалда аяқтады.
Нәтижесінде Дина Исламбекова әлем кубогының қола жүлдегері атанды. World Boxing ұйымының екінші кезеңі 15 маусымда басталып, 21 маусымда мәресіне жетеді. Қазақстан құрамасы бұл жарыста 17 спортшымен өнер көрсетіп жатыр.
