Бибісара Асаубаева Norway Chess турнирінде мерзімінен бұрын жеңіске жетті
Фото: NurPhoto
Қазақстандық шахматшы Бибісара Асаубаева әйелдер арасындағы Norway Chess турнирінің жеңімпазы атанды, деп хабарлайды Pin-UpSport.kz.
Тоғызыншы турда қазақстандық спортшы украиналық Анна Музычукпен кездесті. Негізгі партия тең аяқталғаннан кейін шахматшылар армагеддон форматында қосымша ойын өткізді.
Классикалық партияда жеңіске жетпегеніне қарамастан, Бибісара жинаған ұпайларының арқасында жарыс аяқталуына бір тур қалғанда чемпиондық атақты мерзімінен бұрын қамтамасыз етті.
Соңғы тур қарсаңында қазақстандық шахматшы 16,5 ұпаймен турнир кестесінің көшін бастап тұр. Екінші орында тұрған Анна Музычуктың еншісінде 11,5 ұпай бар. Ал үндістандық Дивья Дешмух пен қытайлық Чжу Цзиньэр 10 ұпайдан жинаған.
Осылайша соңғы тур нәтижесіне қарамастан, қарсыластары Бибісараны қуып жете алмайды. Қазақстандық шахматшы әлемдегі ең беделді турнирлердің бірі саналатын Norway Chess жарысында мерзімінен бұрын жеңіске жетіп, халықаралық деңгейдегі жоғары шеберлігін тағы бір мәрте дәлелдеді.
