Иван Дычко Дана Уайт туралы пікір білдірді
Фото: TKO Worldwide LLC via Getty Images
Қазақстандық боксшы Иван Дычко UFC президенті Дана Уайт туралы пікірін айтып, оның кәсібилігін атап өтті, деп хабарлайды Pin-UpSport.kz. Спортшы функционердің жұмысын сырттай бақылағанын жеткізді.
Дычконың айтуынша, ол Уайтпен жеке сөйлеспеген, бірақ оны бірнеше рет түрлі іс-шараларда көрген. «Жеке танысу бұйырмады. Көрген жерлерім — баспасөз жиындары мен кездесулер. Ол үнемі спортшыларға жылы сөз айтып, жеңіс тілеп, жанкүйерлер үшін тартымды жекпе-жек көрсетуге шақырады. Біз жанкүйерлер үшін жұмыс істейміз», — деді боксшы.
Сондай-ақ ол UFC басшысына баға берді. «Жалпы алғанда, ол позитивті, ашық адам, кәсіби екені көрініп тұр. Өз орнында отыр», — деп қосты Дычко.
Айта кетейік, қазақстандық боксшы соңғы жекпе-жегін Уайт ұйымдастырған шоуда өткізіп, америкалық Джермейн Франклинге жеңілген. Ақпанда Дычконың Zuffa Boxing ұйымымен келісімшартқа отырғаны белгілі болды, алайда келесі жекпе-жектің уақыты әлі жарияланған жоқ.
