Маккенна тағы да Жәнібек Әлімханұлын жекпе-жекке шақырды
Фото: janibek_alimkhanuly/Instagram
Жеңіліп көрмеген ирландиялық орта салмақ боксшысы Аарон Маккенна (20-0, 10 КО) Қазақстан чемпионы Жәнібек Әлімханұлын (17-0, 12 КО) қайтадан жекпе-жекке шақырды, деп хабарлайды Pin-UpSport.kz. Ол The Ring басылымына берген сұхбатында орта салмақтың беделі төмендеп кеткенін айтты.
«Орта салмақ ұйықтап қалды. Бұрын бұл ең қызықты дивизион еді. GGG мен Канело оның беделін сақтап тұрды, бірақ қазір чемпиондар белбеулерін ғана ұстап отыр. Лара бір жылдан бері рингке шыққан жоқ, Адамес те чемпиондармен жолықпайды. Ал Жәнібек титулдарды біріктіруге ниетті жалғыз чемпион сияқты, бірақ басқаларды білсек, оның болуы екіталай», — деді Маккенна.
Оның айтуынша, командасы Әлімханұлының лагерімен байланысқа шығып, жекпе-жекке жақын болған, бірақ қазақстандық боксшы Адамес және Ларамен біріктіру жекпе-жектерін көздеген. «Мен Жәнібектің есігін қағып жүрмін. Оны тактикалық та, агрессивті де бокспен жеңе аламын деп ойлаймын. Ол үздік чемпион шығар, бірақ менің қарқыным мен техникалық әдістеріме әлі тап болған жоқ», — деді ирландиялық боксшы.
Бұған дейін де Маккенна Жәнібекке ашық шақыру тастаған еді. Сол кезде Әлімханұлы құрметпен жауап беріп, басты мақсаты WBC чемпионы Карлос Адамеспен (24-1-1, 18 КО) айқас екенін айтқан болатын.
