Жәнібек Әлімханұлы Карлос Адаместі қорқақ деп айыптады
Жанибек Алимханулы
Орта салмақта WBO мен IBF тұжырымы бойынша әлем чемпионы Жәнібек Әлімханұлы (16-0, 11 КО) WBC белбеуінің иегері Карлос Адаместі (24-1, 18 КО) қорқақ деп атады.
Айта кетейік, қазақстандық боксшы екі жылдан бері Адаместі жекпе-жекке шақырып келеді. Алайда доминикандық спортшы бұл ұсынысты қабылдауға асығар емес.
«Карлосты түсіне алмай-ақ қойдым. Екі белбеуім бар, мен оны жекпе-жекке шақырдым. Бірақ ол менімен жұдырықтасудың орнына, Хамза Ширазбен кездескелі жатыр. Ақша үшін. Адамес менімен жұдырықтасудан қорқады. Өйткені мен оны спаррингте жеңгенмін», – деп жазды Әлімханұлы X-тегі парақшасында.
Айта кетейік, Карлос Адамес пен британдық Хамза Шираздың жекпе-жегі 22 ақпанда өтеді. Бұл кездесуде Адаместің WBC белбеуі сарапқа салынады.
Ал Жәнібек Әлімханұлы 5 сәуір күні Астанада франциялық Анауэль Нгамиссемен (14-0, 9 КО) рингке шығып, екі чемпиондық белбеуін қорғайды.
