Жәнібек Әлімханұлы: «Канело үшін қиын күн болар еді»
Жанибек Алимханулы
WBO және IBF нұсқалары бойынша орта салмақтағы әлем чемпионы Жәнібек Әлімханұлы Сауль Альвареске қарсы лайықты қарсылық көрсете алатынына сенімді.
«Егер ол дайын болса, мен де дайынмын! Барлығы бұл жекпе-жектің немен аяқталатынын біледі! Бұл жай ғана “гонорар алатын күн” болмайды. Канело үшін ауыр, жүйкеге салмақ түсіретін күн болады!» – деп жазды Әлімханұлы X әлеуметтік желісінде, жазбасына өзінің және Альварестің суретін тіркеп.
Дегенмен, қазіргі басты назар алдағы кездесуде. 5 сәуірде Астанада Жәнібек Әлімханұлы франциялық Анауэль Нгамиссенгемен қолғап түйістіріп, чемпиондық атақтарын қорғайды.
Айта кетейік, қазақстандық боксшы бұған дейін орта салмақта барлық белбеуді жинауды мақсат етіп қойғанын айтқан. Сарапшылардың пікірінше, Канелоға қарсы жекпе-жек оның мансабындағы ең үлкен сынақтардың бірі болар еді.
