WBC чемпионы Карлос Адамес Жәнібек Әлімханұлын жекпе-жекке шақырды
Жәнібек Әлімханұлының келесі жекпе-жегіне тағы бір ықтимал қарсылас қосылды. Орта салмақтағы WBC чемпионы Карлос Адамес әлеуметтік желідегі X парақшасы арқылы қазақстандық боксшыға үн қатып, онымен жекпе-жек өткізуге ұсыныс жасады, деп хабарлайды Pin-UpSport.kz.
Доминикандық боксшы Әлімханұлының парақшасын белгілеп, оған: «Жәнібек, енді бәрі таза ма? Қазір жұдырықтасқың келе ме? Дайынсың ба? Онда осыны жасайық», – деп жазды. Адаместің «таза» деген сөзі қазақстандық боксшының допингке қатысты жағдайына байланысты айтылған. Бұған дейін Әлімханұлының сынамасынан мельдоний анықталып, спортшы уақытша шеттетілген еді. Кейін қажетті талаптарды орындаған соң WBO дисквалификацияны мерзімінен бұрын тоқтатты.
Рингке қайта оралғаннан кейін Әлімханұлы мансабын екінші орта салмақта жалғастыру туралы шешім қабылдады. Тамыз айында WBO оны сол кездегі чемпион Хамза Ширазға міндетті қарсылас ретінде бекітті. Алайда боксшылардың командалары міндетті жекпе-жектің шарттары бойынша ортақ келісімге келе алмады. Осыдан кейін промоутерлік сауда ұйымдастырылып, Queensberry Promotions 1 001 809 доллар ұсынса, Top Rank компаниясы 820 мың долларлық ұсыныс жасады.
Саудадан кейін Шираз міндетті қорғаныс кездесуін өткізуден бас тартып, WBO белбеуін босатты. Осыған байланысты екінші орта салмақтағы чемпиондық титул вакантты болып, Әлімханұлының оған таласу мүмкіндігі сақталды. Ал Карлос Адамес орта салмақтағы WBC чемпиондық белбеуін иеленіп отыр. 32 жастағы доминикандық кәсіпқой рингте 27 жекпе-жек өткізіп, 25 рет жеңіске жетті. Оның 18 жеңісі нокаутпен аяқталған. Сондай-ақ оның бір жеңілісі және бір тең нәтижесі бар.
