Виктор Мозес «Қайсарға» ауысуына пікір білдірді
Қызылордалық «Қайсардың» жұлдызды жаңа ойыншысы Виктор Мозес қазақстандық клубқа ауысуына байланысты алғашқы пікірін білдірді, деп хабарлайды Pin-UpSport.kz.
35 жастағы нигериялық жартылай қорғаушы командамен келісімшартқа қол қойғанын растады және Қызылордада өткен ресми таныстырылымнан кейінгі әсерімен бөлісті. Оның айтуынша, ол мансабындағы жаңа кезеңді үлкен қызығушылықпен күтуде.
Виктор Мозес Instagram әлеуметтік желісіндегі парақшасында «Қайсардың» ойыншысы атанғанын қуана хабарлап, таныстырылым кезінде түсірілген суреттерді жариялады. Футболшы алдағы міндеттерге жоғары жауапкершілікпен қарап, жаңа ортаға тез бейімделуге дайын екенін жеткізді. Клуб басшылығы мен бапкерлер штабы тәжірибелі ойыншының келуі команданың жалпы деңгейін көтеріп қана қоймай, жас футболшылардың дамуына да оң әсерін тигізеді деп үміттенеді.
Мозестің Қазақстанға ауысар алдындағы соңғы клубы ағылшынның «Лутон» командасы болды. Өткен маусымда ол барлық турнирлерде 15 матчқа қатысып, бір гол соқты. Жасы ұлғайғанына қарамастан, жартылай қорғаушы әлі де жоғары деңгейде өнер көрсетуге қабілетті екенін көрсетіп келеді, бұл оны «Қайсар» үшін маңызды ойыншы етеді.
Виктор Мозес кәсіби мансабында көптеген танымал клубтардың намысын қорғады. Англияда ол «Кристал Пэлас», «Уиган», «Челси», «Ливерпуль», «Сток Сити» және «Вест Хэм» сапында ойнады. «Челсимен» бірге Англия Премьер-Лигасын, Еуропа лигасын және Англия Кубогын жеңіп алды. Сондай-ақ футболшы Түркияның «Фенербахче», Италияның «Интер» және Ресейдің «Спартак» клубтарында өнер көрсетті. «Қайсарға» ауысу Мозес үшін мансабындағы жаңа белес болса, клуб үшін тәжірибелі әрі беделді ойыншымен күшею мүмкіндігі болып отыр.
Айбар Рысдаулет
Нұрали Жақсылық Грузия клубына ауысуға жақын
«Ақтөбе» Хамес Родригес пен Джердан Шакириді қарастыруда