Тимур Турлов FIDE президенті қызметіне үміткер болды
Фото: Freedom QJ League
Қазақстан шахмат федерациясының президенті Тимур Турлов Халықаралық шахмат федерациясының (FIDE) президенті қызметіне кандидатурасын ұсынғанын мәлімдеді, деп хабарлайды Pin-UpSport.kz.
Бұл туралы Турлов өзінің Instagram парақшасында жариялады. Оның айтуынша, соңғы жылдары шахмат жаңа даму кезеңіне көтеріліп, әсіресе жастар арасында кеңінен танымал бола бастады. Сондай-ақ әлемдік шахмат қауымдастығы барлық құрлықта тұрақты түрде өсіп келеді.
«Бүгінде ғасырлық тарихы бар федерация маңызды кезеңге келіп тұр. Жүріп өткен жолды тоқтатуға немесе жоққа шығаруға болмайды. Ендігі міндет – осы дамуға жаңа серпін беріп, алға қарай қарқынды ілгерілеу», – деп жазды Турлов.
Тимур Турлов Қазақстан шахмат федерациясын 2023 жылдан бері басқарады. Осы уақыт ішінде елімізде ерлер арасындағы әлем чемпионаты матчы мен рапид және блиц бойынша командалық әлем чемпионаты өтті. Ал бір айдан кейін Алматыда университет командалары арасындағы әлем чемпионаты ұйымдастырылады. FIDE президентін сайлау қыркүйек айында Самарқандта өтетін ұйым конгресінде өтеді.
