Шавкат Рахмоновтың октагонға қашан оралатыны белгілі болды
Шавкат Рахмонов
Dar Team командасының бас бапкері Эдуард Базров Шавкат Рахмоновтың (19-0) октагонға шамамен қашан оралатынын айтып, не үшін Белал Мұхаммедпен (24-3) жекпе-жектен бас тартуға мәжбүр болғанын түсіндірді.
— Бұл жарақат Гэрримен болған жекпе-жекте пайда болған. Жақында жазылады деп үміттенгенбіз, бірақ емделу процесі біраз уақытқа созылып кетті. Қазір Шавкаттың жағдайын дұрыстау керек. Әрине, бұл уақытқа дейін аяғын қалпына келтіруге үлгеретін едік, бірақ алда Рамазан бар — сол кезде толыққанды жаттығу жасау қиын болады.
Біз тәуекелге барғымыз келмейді. Ең бастысы — Шавкаттың денсаулығын толықтай қалпына келтіру. Содан кейін асықпай, титулға таласқа дайындаламыз. Октагонға шамамен қашан оралады дейсіз бе? Есептеуім бойынша, жаздың соңы. Әзірше бәрі солай көрініп тұр. Көреміз, — деді Базров «Вестник ММА» YouTube арнасына берген сұхбатында.
Еске салайық, бастапқыда Рахмоновтың UFC турнирінде мамыр айында Белал Мұхаммедпен кездесуі жоспарланған еді. Алайда жарақатына байланысты қазақстандық спортшы жекпе-жектен бас тартуға мәжбүр болды. Кейін ұйымдастырушылар 36 жастағы Мұхаммедтің қарсыласы Джек Делла Маддалена болатынын хабарлады.
