Шавкат Рахмонов титулсыз жекпе-жекке шығудан бас тартты
Шавкат Рахмонов. Фото: Zuffa LLC
UFC-дің жартылай орта салмағындағы рейтингте үшінші орында тұрған қазақстандық файтер Шавкат Рахмонов алдағы жоспарларымен бөлісті, деп хабарлайды Pin-UpSport.kz.
Ulysmedia.kz порталына берген сұхбатында «Номад» лақапатты спортшы титулсыз жекпе-жектерге қызықпайтынын айтты. «Махачев пен Маддалена арасындағы жекпе-жектің нәтижесін күтемін. Жеңімпаз кім болса, сонымен белдік үшін айқасамын. Егер күту керек десе – күтемін, бірақ тек белдік үшін ғана шығамын», – деді Шавкат.
Айта кетейік, Махачев пен Маддаленаның жекпе-жегі әлі ресми түрде бекітілген жоқ. Алайда ол қазан айындағы UFC 321 турнирінде немесе қарашада Нью-Йорктегі UFC 322 кешінде өтуі мүмкін. Бұған дейін Шавкат Рахмонов чемпиондық белдік үшін Белал Мұхаммедпен жұдырықтасуы тиіс еді. Бірақ бұл айқас екі рет кейінге шегерілді: алдымен америкалық бас тартты, кейін Рахмонов жарақатына байланысты шегінді.
Нәтижесінде, Шавкаттың орнына Делла Маддалена шығып, Мұхаммедті жеңіп, чемпион атанды. Ал Рахмонов желтоқсанда Иэн Гэрриді жеңіп, жеңіліссіз сериясын 19 жекпе-жекке жеткізді.
