Қазақстанда ең танымал спорт түрі белгілі болды
Футбольный болельщик. Фото: FIFA via Getty Images
Қазақстан Республикасының Туризм және спорт министрлігі 2024 жылдың қорытындысы бойынша еліміздегі ең танымал спорт түрлерінің тізімін жариялады. Бұл деректер халықтың бұқаралық және ұйымдасқан спортқа қатысу көрсеткіштерін қамтиды.
Көш басында футбол тұр – қазір Қазақстанда 1 113 299 адам футболмен айналысады. Оның ішінде жартысынан көбі ауылдық жерлерде тұрады. Бұл футболдың еліміздің түкпір-түкпірінде қолжетімді әрі кең таралған спорт екенін көрсетеді.
Екінші орында – волейбол (767 580 адам), одан кейін баскетбол (541 819), футзал (368 349), жеңіл атлетика (347 654), шахмат (278 101), үстел теннисі (262 835), дойбы (213 490), тоғызқұмалақ (202 217) және қазақ күресі (160 399) тұр.
Министрлік халықтың дәстүрлі де, заманауи да спорт түрлеріне қызығушылығы артқанын атап өтті. Алдағы уақытта бұқаралық спортты дамыту мен өңірлерде спорттық инфрақұрылымды жақсарту жұмыстары жалғаса береді.
