Қазақстан балуандары Моңғолиядағы турнирде үш медаль жеңіп алды
Қазақстанның күрес құрамасы Моңғолияның Ұлан-Батыр қаласында өтіп жатқан рейтингтік турнирде тағы үш медаль еншіледі, деп хабарлайды Pin-UpSport.kz.
Жарыстың кезекті күнінде қазақстандық спортшылар үш қола жүлдеге қол жеткізді.
Грек-рим күресінен 63 келіге дейінгі салмақ дәрежесінде өнер көрсеткен Еркебұлан Ардақов қола медаль үшін белдесуде оңтүстіккореялық Хенун Чхведен басым түсті.
Ал 130 келіге дейінгі салмақта Олжас Сырлыбай үндістандық Джогиндер Ратхиді сенімді жеңіп, үшінші орынға ие болды.
Әйелдер күресінде 57 келіге дейінгі салмақта Нилуфар Раимова Сингапур өкілі Даниэль Сью Чинг Лимді жеңіп, қола жүлдені жеңіп алды.
50 келіге дейінгі салмақта сынға түскен Марал Танирбергенова өз белдесуінде жеңіліс тапты. Ал 72 келіге дейінгі салмақта қола медаль үшін күресуі тиіс болған Жәмилә Бақбергенова жарақатына байланысты жарысты жалғастыра алмады.
Айта кетейік, бұған дейін 97 келіге дейінгі салмақта грек-рим күресінің өкілі Нұрасыл Аманалы күміс жүлдеге қол жеткізген болатын.
