Қазақ боксшылары жаңа сынға дайындалып жатыр
Фото: Olympic.kz
Қазақстан құрамасының бас бапкері Қайрат Сатжанов Баку мен Хабаровскідегі халықаралық жарыстардан кейінгі алдағы жоспарларымен бөлісті. Оның айтуынша, команда бірқатар маңызды жарысқа қатысуға дайындалып жатыр.
«Алдағы уақытта Моңғолия, Қырғызстан, Таиланд және Чехияда өтетін турнирлер күтіп тұр. Бұл — жастарға өзін көрсетуге таптырмас мүмкіндік. Жақын арада өтетін оқу-жаттығу жиындарынан кейін боксшыларымыз сол жарыстарға аттанады», – деді Сатжанов Olympic.kz сайтына берген сұхбатында.
Сонымен қатар, алдағы ірі бәсекелердің бірі — Астанада өтетін Әлем кубогының екінші кезеңі болмақ. Бұл турнирге ұлттық құраманың негізгі мүшелері қатысады. Еске салайық, Бакудегі «Жібек жолы» турнирінде екінші құрам екі алтын, бір күміс және алты қола жүлде иеленді. Ал Хабаровскідегі турнирде негізгі құрам 11 медаль жеңіп алды.
