ПСЖ тарихында алғаш рет УЕФА Суперкубогын жеңіп алды
ПСЖ. Фото: Getty Images
Париждің «ПСЖ» клубы УЕФА Суперкубогы үшін өткен ойында Лондонның «Тоттенхэмін» тізе бүктірді. Негізгі уақыт 2:2 есебімен аяқталып, пенальти сериясында француздар 4:3 есебімен жеңіске жетті, деп хабарлайды Pin-UpSport.kz.
Италияның Удине қаласында өткен кездесуде есепті 39-минутта «Тоттенхэм» қорғаушысы Мики ван де Вен ашты. Үзілістен кейін Кристиан Ромеро айырманы ұлғайтты. 85-минутта Кан Ин Ли бір гол соғып, 90+4-минутта Гонсалу Рамуш таразы басын теңестірді. Пенальтиде «ПСЖ» мергендігімен көзге түсті.
Бұл ойында париждіктердің қақпасын командаға жаңадан қосылған Люк Шевалье қорғады. Ал ресейлік қақпашы Матвей Сафонов алаңға шыққан жоқ. «ПСЖ» Суперкубокқа Чемпиондар лигасының 2024/25 жылғы жеңімпазы ретінде қатысты, ал «Тоттенхэм» Еуропа лигасының иегері ретінде өнер көрсетті. Француз клубы бұл трофейді тарихында алғаш рет иеленді. Бұған дейін, 1996 жылы, олар «Ювентуске» жалпы есеппен жол берген еді.
