OCTAGON лигасының қос чемпионы UFC жолдамасы үшін сынға түседі
Фото: OCTAGON
Қазақстандық OCTAGON лигасының бұрынғы чемпиондары Муртазали Магомедов пен Азамат Нуфтиллаев UFC-ге өтуге мүмкіндік беретін DWCS турниріне шақырту алды, деп хабарлайды Pin-UpSport.kz.
Жеңіліп көрмеген Муртазали Магомедов (9-0) бұл додада UFC келісімшарты үшін күреспек. Ол 2023 жылы Сардор Худойбердиевті қылқындыру әдісімен жеңіп, чемпион атанған. Кейін Клаудисио Бритоны жеңіп, белбеуін қорғаған. Қазір Лас-Вегастағы Syndicate MMA клубында жаттығып жүр. Сонымен қатар, ол The Ultimate Fighter 33 финалына дайындалып жатқан қазақстандық Әліби Ыдырысқа көмектесіп, шешуші жекпе-жекте оның бұрышында болады.
DWCS турниріне қатысатын екінші спортшы — ауыр салмақтағы Азамат «Айдаһар» Нуфтиллаев (17-1-1). Ол 6 шілдеде өткен Octagon 75 турнирінде қарсыласын «солтүстік-оңтүстік» әдісімен жеңіп, уақытша чемпион атанды.
Екі спортшының да жекпе-жек күндері мен қарсыластары кейінірек ресми түрде хабарланады. UFC-ге өтуге нақты мүмкіндіктері бар қос файтер жанкүйерлер үмітін ақтауға дайын.
