Николя Винокуров XDS Astana Team-мен 2027 жылға дейін келісімін ұзартты
Фото: astanafans.com
Қазақстандық велошабандоз Николя Винокуров әлемдік турдағы XDS Astana Team командасымен екі жылдық жаңа келісімшартқа қол қойды. Ол 2026 және 2027 маусымдарын қамтиды, деп хабарлайды Pin-UpSport.kz.
23 жастағы спортшы биыл ерекше маусым өткізді. Қазан айында ол Азиядағы ең беделді көпкүндік жарыстардың бірі — «Тур Лангкавиде» (2.Pro санаты) жалпы есепте төртінші болып, ең үздік азиялық шабандоз атағына ие болды. Бұған дейін жазда «Австрия турының» таулы кезеңдер рейтингінде жеңіске жеткен еді.
Бұрын Николя Азия чемпионатында (U23) жеке жарыста (2024) және Қазақстан чемпионатында топтық жарыста (2023) алтын медаль иеленген.
«XDS Astana Team командасының намысын қорғауды жалғастыру — мен үшін үлкен құрмет. Биылғы маусым менің мансабымда жаңа белес болды. Алдағы екі жылда басты мақсатым — кәсіби деңгейде жеңістерге жету», — деді Николя Винокуров.
Команданың бас менеджері Александр Винокуров:
«Биыл Николя айтарлықтай өсім көрсетті. Тәжірибесі мен сенімділігі артты. Қазір ол қазақстандық кәсіби шабандоздардың үздіктерінің бірі, ал алда — жаңа биіктерге жетуге мүмкіндік беретін екі маусым бар», — деп атап өтті.
