«Левски» «Астана» ойыншысы үшін 2,5 миллион еуро ұсынды
Фото: ФК «Астана»
«Астананың» жартылай қорғаушысы Иван Башич Болгария чемпионатына ауысуы мүмкін, деп хабарлайды Pin-UpSport.kz.
Дереккөз мәліметінше, Софияның «Левски» клубы 24 жастағы футболшыға қызығушылық танытып, елордалық командаға алғашқы трансферлік ұсынысын жолдаған.
Келісім құны шамамен 2,5 миллион еуро болуы мүмкін екені айтылуда.
Алайда «Астана» басшылығы команданың негізгі ойыншыларының бірі саналатын Башичті сатуға асығар емес. Клуб босниялық футболшының ӘЧ-2026 турниріндегі сәтті ойыны оның трансферлік бағасын арттырады деп үміттенеді.
Осы маусымда Башич барлық турнирде 25 матч өткізіп, үш гол соғып, алты нәтижелі пас берген.
Футболшының «Астанамен» келісімшарты 2028 жылдың соңына дейін жарамды.
Айта кетейік, Иван Башич Босния және Герцеговина құрамасының ӘЧ-2026 турниріне арналған соңғы құрамына енді. Топтық кезеңде оның құрамасы Канада, Катар және Швейцариямен кездеседі.
