Ковригин Сауд Арабиясындағы жекпе-жекте мұрнын сындырып, жеңіліп қалды
Александр Ковригин. Фото: alexx_boxing/Instagram
17 сәуір күні Сауд Арабиясында өткен WBC Гран-при турнирінде қазақстандық боксшы Александр Ковригин (8-1, 6 КО) АҚШ өкілі Трой Нэшемен (4-0, 1 КО) жұдырықтасып, алғаш рет кәсіпқой рингте жеңіліс тапты.
BoxRec сайтының редакторы әрі The (un)Professional Boxing подкастының жүргізушісі Грей Джонсонның айтуынша, жекпе-жек барысында Ковригин мұрнын сындырып алған. Қарсыласы жылдам қолын тиімді пайдаланып, Ковригиннің шабуылдарын дер кезінде тойтарып отырған. Үшінші раундта ережені бұзғаны үшін Нэштен бір ұпай шегерілгенімен, төрешілер шешімімен жеңіс соған бұйырды — 58-55, 58-54, 56-57.
Осылайша, Трой Нэш WBC Гран-приіндегі АҚШ боксшылары үшін екінші жеңісті тіркеді. Ал Ковригин алғашқы жеңілісін тіркеп, жарысты жалғастыру мүмкіндігінен айырылды.
