Футболдан әлем чемпионын 250 миллион теңгеге тонап кетті
Оливье Жиру
АҚШ-тың Лос-Анджелес қаласында Франция құрамасының бұрынғы шабуылшысы Оливье Жирудың үйін тонап кетті.
Ақпарат көздерінің мәліметінше, 5 ақпанда футболшының жары полицияға хабарласқан. Ол үйдегі терезенің сынғанын байқап, бірден құқық қорғау органдарына жүгінген.
Ұрланған заттардың ішінде 10-нан аса қымбат сағат бар екені анықталды. Шығын көлемі шамамен 500 мың долларды (250 миллион теңге) құрайды. Қазір полицейлер ұрыларды іздестіріп жатыр.
38 жастағы Жиру 2024 жылдың шілдесінен бері «Лос-Анджелес» клубында ойнайды. Бұған дейін ол «Милан», «Челси», «Арсенал», «Монпелье», «Тур» және «Гренобль» клубтарының намысын қорғаған.
Оливье Жиру — Франция құрамасының тарихындағы ең үздік сұрмерген. Ол 2018 жылы әлем чемпионы атанды. Сондай-ақ, 2022 жылғы әлем чемпионаты мен 2016 жылғы Еуропа чемпионатының күміс жүлдегері.
