Бублик «Ролан Гарроста» алғаш рет ширек финалға шықты
Фото: The New York Times
Франция ашық біріншілігінің (Ролан Гаррос) ерлер арасындағы жекелей сынының ширек финалына жолдама алған барлық теннисшілер белгілі болды.
Қазақстандық Александр Бублик үшін бұл – «Үлкен дулыға» турниріндегі алғашқы ширек финал. Ол әлемнің бірінші ракеткасы, италиялық Янник Синнермен кездеседі. 1/8 финалда Синнер ресейлік Андрей Рублевті (15) үш сетте оңай ұтты – 6:1, 6:3, 6:4. Ал Бублик сенсация жасап, бесінші нөмірлі Джек Дрейперді жарыс жолынан шығарды – 5:7, 6:3, 6:2, 6:4.
Бұған дейін қос теннисші төрт рет жолыққан. Соның үшеуінде Синнер жеңіске жетсе, біреуінде Бублик басым түсті. Соңғы матч 2022 жылы Галледе өтіп, Бублик 7:5, 2:0 есебімен жеңіске жеткен. Синнер екінші сетте жарақатына байланысты ойынды тоқтатқан.
Қалған жұптарда Александр Зверев (Германия, 3) Новак Джоковичпен (Сербия, 6), Лоренцо Музетти (Италия, 7) Фрэнсис Тиафомен (АҚШ, 16), ал Карлос Алькарас (Испания, 2) Томми Полмен (АҚШ, 12) кездеседі. Турнир 8 маусымда аяқталады.
