Бокс Олимпиада-2028 бағдарламасына қайта енді
Халықаралық Олимпиада комитеті (ХОК) Лос-Анджелесте өтетін 2028 жылғы Олимпиада ойындарының бағдарламасына боксты ресми түрде қосты. Бұл шешім Грецияда өткен 144-сессияда қабылданды. Бұған дейін Халықаралық бокс қауымдастығындағы (IBA) мәселелерге байланысты спорт түрі Олимпиададан шеттетілуі мүмкін болған еді.
Париж-2024 Олимпиадасында бокс арнайы ХОК-тың бақылауындағы жұмыс тобының басшылығымен өтті, бұл спорттың олимпиадалық қозғалыс үшін маңыздылығын дәлелдеді. Енді World Boxing ұйымы олимпиадалық боксқа жетекшілік ететін болды. 2023 жылы құрылған бұл ұйымға 84 ұлттық федерация, оның ішінде Қазақстан бокс федерациясы да кіреді.
Олимпиадалық комиссияның төрағасы Геннадий Головкин бұл шешімнің World Boxing-тың мақсатты жұмысының нәтижесі екенін атап өтті. Оның айтуынша, боксты Олимпиада бағдарламасында сақтау – мыңдаған спортшыға өз армандарын орындауға мүмкіндік береді.
Олимпиада-2028 14-30 шілде аралығында Лос-Анджелесте өтеді.
