Бокс федерациясы Варшавадағы әлем Кубогына Қазақстан құрамасы неге қатыспайтынын түсіндірді
Федерации бокса Казахстана. Фото: Olympic.kz
Польша астанасы Варшавада өтіп жатқан World Boxing ұйымының Кубогіне Қазақстан құрамасы неге қатыспағаны туралы бокстан Қазақстан федерациясының атқарушы директоры Рауан Игенев пікір білдірді. Айта кетейік, бұл додаға Өзбекстан ең мықты боксшыларын аттандырған.
«Әр құраманың өз жоспары бар. Біз де солай, өз бағытымызбен дайындалып жатырмыз. Қазір ешбір спортшымыз бос емес – бірі жарыста жүр, енді бірі жаттығуда. Барлығы нақты кестемен жұмыс істеп жатыр», – деді Игенев Sportbugin.kz сайтына берген сұхбатында.
Оның айтуынша, бұл шешім рейтингке еш әсер етпейді.
«Біз Польшадағы жарысқа қатыспадық деп, ұпай жоғалтпаймыз. Келесі жарысымызға Өзбекстан келмей қалуы да мүмкін. Бұл – қалыпты жағдай. Әр команда қай турнирге баратынын өзі шешеді», – деп түйіндеді ол.
