Бибисара Асаубаева ресейлік шахматшыдан реванш алып, алғашқы жеңісіне жетті
Қазақстандық шахматшы Бибисара Асаубаева Tech Mahindra Global Chess League-2026 турнирінде алғаш рет жеңіске жетті, деп хабарлайды Pin-UpSport.kz. Үндістанның Бангалор қаласында өтіп жатқан жарыстың сегізінші турында оның EYERS American Gambits командасы Ganges Grandmasters ұжымын 13:5 есебімен жеңді.
Бұл жолы Бибисара ресейлік Полина Шуваловамен кездесті. Екі шахматшы бұған дейін де осы турнирде бір-біріне қарсы ойнаған. Сол кездесуде Шувалова басым түссе, бұл жолы қазақстандық спортшы қарымта қайтарды. Асаубаева қарсыласын 3:0 есебімен жеңіп, команданың жалпы жеңісіне өз үлесін қосты.
Бұған дейінгі жеті партияда Бибисара жеңіске жете алмаған еді. Ол төрт кездесуде тең түсіп, тағы үш ойында қарсыластарына есе жіберді. Сондықтан Шуваловаға қарсы алынған жеңіс қазақстандық шахматшы үшін турнирдегі алғашқы сәтті нәтиже болды.
Осылайша сегіз партиядан кейін Асаубаеваның есебінде бір жеңіс, төрт тең ойын және үш жеңіліс бар. Tech Mahindra Global Chess League-2026 жарысы Үндістанда 5-13 қыркүйек аралығында өтеді. Биылғы турнирге әлемнің жетекші шахматшылары қатысып жатыр, ал жарыстың жалпы жүлде қоры бір миллион долларды құрайды.
