Азияны бағындырған боксшылар: Қазақстан U22 чемпионатында топ жарды
Фото: kazsports.kz
10–24 мамыр аралығында Шри-Ланканың Коломбо қаласында өткен 22 жасқа дейінгі Азия чемпионаты өз мәресіне жетті. ҚР Туризм және спорт министрлігіне қарасты Спортты дамыту дирекциясының мәліметінше, ерлер құрамасы 10 алтын, 2 күміс медаль жеңіп алып, жалпыкомандалық есепте көш бастады.
Жарыстың соңғы күнінде 13 салмақ дәрежесінде чемпиондар анықталды. Қазақстан сапынан тек 54 келідегі Кенже Мұратұлы алғашқы айналымда қарсыласына есе жіберсе, қалған 12 боксшымыз финалға шығып, 10-ы жеңіс тұғырынан көрінді.
Бақыт Сәрсекбаев жаттықтыратын ерлер құрамасы үшін бұл – 22 жасқа дейінгі Азия чемпионатына үшінші рет қатысу. 2023 жылы Таиландта үш алтынмен шектелсе, 2024 жылы Астанада өткен жарыста 8 алтынға қол жеткізген болатын. Биыл Қазақстан құрамасы жарысқа толық құраммен қатысқан жалғыз ел атанды.
Чемпионат жеңімпаздарына Халықаралық бокс федерациясы тарапынан қаржылай сыйақы берілді: 1-орын — 1000 доллар, 2-орын — 500 доллар, 3-орын — 250 доллар.
