Артем Резников допинг қолданғанын жасырмады
Артем Резников. Фото: vesti.kz
Қазақстандық ММА файтері Артем Резников спорттық мансабының басында түрлі физикалық дайындықты жақсартатын препараттарды қолданып көргенін айтты. Бұл туралы ол Sarbaz Podcast-ке берген сұхбатында бөлісті.
«Карьерамды бастағанда бәрі ақыл айтып жатты: «мынаны іш, ананы ал» деп. Өзім де бірнәрселерді сынап көрдім. Бірақ ең жақсысы – жүрекке арналған дәрілер екенін түсіндім. Себебі рингте ең мықты емес, ең жақсы тыныстай алатын жеңіске жетеді. Әсіресе бес раундтық айқастарда», – деді Резников.
Оның айтуынша, стероид қолданатын спортшылар ерте кетеді, себебі ол ағзаны әлсіретеді. «Ал дәріханалық, венаға егілетін препараттар тек спорттық форманы ғана емес, ішкі ағзаны да жақсартады. 40 жасқа дейін жұдырықтасатындар – дәл осындай дәрілерді қолданатындар», – деп түйіндеді Артем.
