Айдос Ербосынұлы үлкен рингке оралмақ
Айдос Ербосынулы
Танымал қазақстандық боксшы Айдос Ербосынұлы (16-1, 11 КО), WBO Global мен WBC Asian белбеулерінің иегері әрі екінші орта салмақта WBA чемпиондық атағына бұрынғы үміткер, кәсіби боксқа қайта оралуы мүмкін екенін айтты.
Жаркенттік спортшының айтуынша, ол жанкүйерлерін мансабын жалғастыратыны жайлы жағымды жаңалықпен қуантпақ.
— Соңғы жекпе-жегімнен бері біраз уақыт өтті. Қазір белгілі бір жоспарларым бар, оларды ой елегінен өткізіп жүрмін. Алдағы уақытта мансабыма қатысты маңызды мәлімдеме жасаймын. Ин ша Аллах, жақсы жаңалық күтіңіздер, — деді Айдос Sportnews.kz-ке берген сұхбатында.
Кәсіби рингте Ербосынұлы 17 жекпе-жек өткізіп, соның 16-сында жеңіске жеткен. Оның 11 қарсыласын нокаутпен ұтқан. Мансабы барысында Айдос АҚШ, Беларусь, Австралия, Ресей, Украина және Қазақстанда өнер көрсеткен.
