«Афродита кубогында» бес медаль: отандық гимнасшылар топ жарды
Эрика Жайлауова
21-23 наурыз аралығында Грекияның Фалиру қаласындағы Олимпиадалық гимнастика орталығында көркем гимнастикадан «Афродита кубогы» халықаралық турнирі өтті. Биыл оныншы мәрте ұйымдастырылған жарысқа 27 елден 310 спортшы қатысты.
Қазақстан құрамасы турнирде сәтті өнер көрсетіп, бес жүлде иеленді. Қыздарымыз екі алтын, екі күміс және бір қола медаль жеңіп алды.
Лентамен орындаған жаттығуда Эрика Жайлауова чемпион атанды (26.550), ал Айым Мейіржанова екінші орынға табан тіреді (25.700). Үшінші орынды Болгариядан келген Яница Диниева иеленді (25.200). Ал шеңбермен жаттығуда Милана Парфилова (26.650) алтын медаль жеңіп алды.
Доппен өткен финалда итальяндық Алис Таглиетти (27.400) топ жарды. Эрика Жайлауова бұл сында да жақсы нәтиже көрсетіп, күміс жүлдеге қол жеткізді (26.700). Қоланы Италия гимнасышысы Изабель Тавано еншіледі (25.400).
