Әли Әлиев: «Жігіттер ел үшін соңына дейін ойнауы керек»
Фото: Getty Images
Футболдан Қазақстан құрамасының бас бапкері Әли Әлиев Беларусьпен болатын жолдастық ойын алдында пікір білдірді. Оның айтуынша, бұл кездесу бекер таңдалмаған. Себебі Беларусь те, Солтүстік Македония да үш орталық қорғаушымен ойнайды. Бұл – ресми ойын алдындағы жақсы дайындық. Сонымен қатар, бапкер құрамда бірқатар ойыншының болмауына байланысты қиындық бар екенін айтты. Роман Асранқұлов отбасындағы ауыр жағдайға байланысты командадан рұқсат алып кеткен. Рамазан Оразов, Абат Айымбетов және Әлібек Қасымның да жеңіл жарақаттары бар.
Әлиев Айбар Жақсылықовтың құрамаға өкпе қабынуымен келгенін және ол үшін Рамазан Каримов шақыртылғанын айтты. Бірақ оның да бел тұсынан жарақаты бары анықталған. Оралхан Өміртаевқа қатысты да пікір білдірген бапкер шабуыл шебінде өзіміздің ойын стиліне сай футболшылар бар екенін атап өтті. Ал Дастан Сатпаевтың жастар құрамасына өткені – оның көбірек ойын тәжірибе жинауы үшін қабылданған шешім.
Рамазан Оразовтың неге құрамадан тыс қалғаны туралы да айтылды. Әлиев бұл ойыншымен жеке сөйлесіп, шешімді түсіндіргенін жеткізді. Оның сөзінше, Оразов соңғы кезде клубында көп ойнамағандықтан тізімге енбеген. Бірақ тәжірибелі әрі қарқыны жоғары футболшы ретінде болашақта әлі де қажет екенін айтты.
Соңында Әли Әлиев өзі бас бапкер ретінде ерекше қысым сезінбейтінін, басты мақсат – құраманың әр ойынынан максимум нәтиже алу екенін атап өтті. «Бұл – ұлттық құрама. Мұнда келген әр ойыншы ел намысы үшін барын салуы керек», – деді ол.
