Қайрат Ахметов ACA лигасында өнер көрсетеді
Кайрат Ахметов. Фото: ONE FC
Аса жеңіл салмақта ONE Championship чемпионы атанған Қайрат Ахметов (30-2) енді ACA ұйымында жекпе-жекке шығады, деп хабарлайды Pin-UpSport.kz.
37 жастағы қазақстандық файтердің дебюті 19 қыркүйекте Алматыда өтетін ACA 189 турнирінде емес, қазан айында Дубайдағы додада болмақ. Соңғы рет Ахметов Астанада өткен Alash Pride 108 турнирінде грэпплинг ережесі бойынша Генри Сехудомен күш сынасып, 5:8 есебімен жеңілді. Жекпе-жектен кейін ол төрешілердің шешімімен келіспейтінін мәлімдеген еді.
Ахметов ММА тарихындағы ең табысты қазақ спортшыларының бірі саналады. Ол 2015 жылы Адриано Мораесті жеңіп, ONE белдігін иеленді. Жалпы мансабында 32 кездесу өткізіп, оның 30-ында жеңіске жеткен. Бұған дейін ол Деметриус Джонсонға қарсы титулдық айқасқа жақын болғанымен, келіссөздер нәтиже бермеді. Кейін антидопинг ережесін бұзғаны үшін жарты жылға жарыстардан шеттетілген еді.
