Шавкат Рахмонов қарашада жекпе-жек өткізуі мүмкін
Фото: Zuffa LLC
UFC-де өнер көрсететін қазақстандық файтер Шавкат Рахмоновтың менеджері Саят Әбдрахманов шәкіртінің келесі жекпе-жегі жайлы пікір білдірді, деп хабарлайды Pin-UpSport.kz.
Оның айтуынша, Шавкат үшін ең ыңғайлы уақыт — қараша айы. Себебі дәл сол кезде Ислам Махачев пен Джек Делла Маддалена арасындағы кездесу өтуі ықтимал. «Шавкат чемпионмен бір күнтізбелік ауқымда жүргені дұрыс», — дейді менеджер.
Сондай-ақ Әбдрахманов Шавкаттың бұған дейін екі рет титулдық жекпе-жекке жақын болғанын еске салды. Өткен жылдың желтоқсанында Белал Мұхаммед жарақатына байланысты жекпе-жек өтпей қалды. Ал биыл мамырда Шавкаттың өзі жарақат алып, кездесуге шыға алмады. Егер денсаулығында мәселе болмаса, ол Усманмен немесе Мұхаммедпен күзде жұдырықтасуы мүмкін.
Айта кетейік, Рахмонов соңғы рет октагонға өткен жылдың желтоқсанында шығып, ирландиялық Иэн Гэрриді төрешілер шешімімен жеңген болатын.
