Қазақстандық екі каратэші әлемнің үздігі атанды
Фото: kazsports.kz
Марокконың Рабат қаласында каратэден WKF тұжырымы бойынша Премьер-лиганың биылғы соңғы турнирі мәресіне жетті.
Жыл бойы өткен төрт жарыстың қорытындысы бойынша Мөлдір Жаңбырбай (50 келіге дейін) мен Әсел Қанай (61 келіге дейін) өз салмағында ең көп ұпай жинап, «Grand Winner» атағына ие болды. Қазақстандық каратэшілердің қатарынан алғаш рет екі спортшы қатарынан осындай жоғары марапат алды.
Мөлдір былтыр да дәл осы атақты жеңіп алған болатын. Ол – бұл марапатқа екі мәрте қол жеткізген алғашқы қазақстандық спортшы. Биылғы маусымда Мөлдір Парижде қола, Ханчжоуда күміс, Каирде алтын иеленді. Әсел болса, Париж бен Каирде күміс, Ханчжоуда қола медаль еншіледі.
Айта кетейік, Токио Олимпиадасының жүлдегері Софья Берульцева да бұл марапатқа үміткер еді. Алайда Рабаттағы топтық кезеңде жолы болмай, ұпай саны бойынша басты қарсыласынан қалып қойды.
