Шавкат Рахмоновтың октагонға оралатын уақыты белгілі болды
Шавкат Рахмонов. Фото: Zuffa LLC
Қазақстандық UFC жекпе-жек шебері Шавкат Рахмоновтың (19-0) бапкері Эдуард Базров шәкіртінің қашан қайта жекпе-жекке шығатынын айтты. Оның сөзінше, Шавкат Алматыда дайындалып жатыр және жарақатынан кейін жаттығуға толық кіріскен.
«Қазір Шавкат жаттығуларын бастады. Жағдайы жақсарып келеді, толыққанды жұмыс істей алады. Қайта жекпе-жекке шығуды күзге — шамамен қазан айына жоспарлап отырмыз. Қазір қарап отырмай, қозғалыста болуымыз керек. Уақыт өтуде, жаңа есімдер шығып жатыр», – деді Базров «Спорт Шредингера» арнасына берген сұхбатында.
Сондай-ақ бапкер 11 мамырда Монреальда өтетін Белал Мұхаммад пен Джек Делла Маддалена арасындағы чемпиондық жекпе-жекке қатысты да пікір білдірді. «Меніңше, бұл жекпе-жекте Белал жеңіске жетеді. Осыдан кейін біз бастапқы жоспарымызды жүзеге асыра аламыз деп үміттенемін. Шавкат чемпиондық айқасты қатты қалайды», – деді ол.
Айта кетейік, Рахмонов соңғы жекпе-жегін 2024 жылдың желтоқсанында өткізіп, Иэн Гэрриді төрешілер шешімімен жеңген еді. Бастапқыда оның қарсыласы Белал Мұхаммад болуы керек болған, бірақ ол кездесу денсаулығына байланысты өтпей қалған.
