Қазақстан құрамасы кадеттер арасындағы әлем чемпионатының командалық финалына алғаш рет шықты
Қазақстанның дзюдодан кадеттер құрамасы Эквадордың Гуаякиль қаласында өтіп жатқан әлем чемпионатындағы аралас командалық жарыстың финалына тарихта алғаш рет жолдама алды, деп хабарлайды Pin-UpSport.kz.
Жартылай финалда Қазақстан құрамасы Өзбекстан спортшыларын 4:2 есебімен жеңіп, жарыстың шешуші кезеңіне өтті. Финалға шығу үшін ел намысын 48 келіге дейінгі салмақта Зере Талғатқызы, 60 келіге дейінгі санатта Ғабит Расулхан, 63 келіге дейінгі салмақта Әзима Серік, 81 келіге дейінгі салмақта Алижан Сайлаубеков, 63 келіден жоғары салмақта Тоғжан Төлебай және 81 келіден жоғары санатта Әділжан Жаудинов қорғады. Осы құрам Қазақстанға тарихи нәтижеге жетуге мүмкіндік берді.
Қазақстандық дзюдошылар финалға дейін Болгария құрамасын 4:1 есебімен жеңді. Одан кейін ширек финалда әлемдік дзюдодағы мықты командалардың бірі саналатын Жапония құрамасымен кездесті. Бұл бәсекеде қазақстандық спортшылар 4:2 есебімен жеңіске жетіп, жапон командасын жарыстан шығарды. Жартылай финалда Өзбекстанды да жеңіп, финалға жолдама алды.
Әлем чемпионатының финалында Қазақстан құрамасы Бразилия командасымен кездеседі. Шешуші бәсеке Астана уақытымен 03:00-де басталады. Бұған дейін Қазақстан кадеттер арасындағы әлем чемпионатының аралас командалық жарысында финалға ешқашан шықпаған еді. Айта кетейік, жеке жарыстарда Қазақстан спортшылары 10 медаль жеңіп алды. Оның ішінде үш алтын, үш күміс және төрт қола жүлде бар. Осы нәтижемен Қазақстан жалпы медальдық есепте екінші орынға жайғасты.
