Дастан Сатпаев «Челсидің» оқу-жаттығу жиынына аттанды
Фото: м
Қазақстандық шабуылшы Дастан Сатпаев мансабындағы жаңа кезеңді бастау үшін Лондонға аттанды, деп хабарлайды Pin-UpSport.kz. 17 жастағы футболшы алдағы күндері Англияның «Челси» клубының маусым алдындағы оқу-жаттығу жиынына қосылып, жаңа командасымен алғаш рет жұмыс істейді.
Футболшының жолға шыққанын Scout in Eurasia парақшасы әуежайдан жарияланған фотосуреттер арқылы хабарлады. Дереккөздің мәліметінше, Сатпаевпен бірге Англияға анасы да аттанған, ал ағасы Дархан оны әуежайдан шығарып салған. Бұл сапар жас шабуылшының «Қайраттағы» кезеңін аяқтап, лондондық клуб жүйесіне бейімделуінің алғашқы қадамы болмақ.
Маусым айында Дастан Сатпаев «Қайратпен» ресми түрде қоштасты. Халықаралық трансфер ережелеріне сәйкес, ол 18 жасқа тамыз айында толғаннан кейін ғана «Челси» сапына толыққанды тіркеле алады. Осы уақытқа дейін қазақстандық футболшы клубтың инфрақұрылымымен танысып, маусым алдындағы дайындық жұмыстарына қатысады.
Дастан Сатпаев «Қайрат» сапында 58 матч өткізіп, 26 гол соқты және 10 нәтижелі пас берді. Бұқаралық ақпарат құралдарының мәліметінше, қазақстандық шабуылшының трансфері «Челсиге» шамамен 2,4 миллион еуроға түскен. Бұл келісім қазақстандық футбол тарихындағы ең ірі трансферлердің бірі саналады.
Айбар Рысдаулет
Ислам Чесноков «Тоболға» оралуға жақын
Қазақстандық файтер Жасұлан Әкімжан ACA турнирінде дебют жасайды