Қазақстан дзюдошылары Эстониядағы турнирді жүлдесіз аяқтады
Қазақстанның дзюдо құрамасы Эстонияда өткен European Open халықаралық турниріндегі жарыс жолын медальсыз аяқтады, деп хабарлайды Pin-UpSport.kz.
Қазақстандық спортшылар арасындағы ең үздік нәтижені 100 келіден жоғары салмақта белдескен Ардақ Серіков көрсетті.
Отандасымыз қола медаль үшін өткен белдесуге дейін жеткенімен, украиналық Федір Ярошенкоға есе жіберіп, жарысты бесінші орынмен аяқтады.
73 келіге дейінгі салмақта Ернар Кеңесқан екі кезеңнен сәтті өтіп, үшінші айналымға шықты. Алайда бұл кезеңде ирландиялық Джошуа Гриннен жеңілді. Осы салмақта сынға түскен Мағжан Алжанов жарысты екінші айналымда аяқтады.
Даурен Сүйкенов (60 келіге дейін), Табылды Бигамбаев (66 келіге дейін), Оразгелді Уралов (81 келіге дейін) және Сымбат Тағай (48 келіге дейін) алғашқы белдесулерінде жеңіліп, жарыстан ерте шығып қалды.
Осылайша Қазақстан құрамасы Эстониядағы халықаралық турнирді жүлдесіз аяқтады.
