Нұрғожайдың UFC 326 турниріндегі гонорары белгілі болды
Фото: Zuffa LC
UFC 326 турниріне қатысқан файтерлердің болжамды гонорарлары жарияланды, деп хабарлайды Pin-UpSport.kz. Sporty Salaries порталының мәліметіне сәйкес, турнирде өнер көрсеткен қазақстандық файтер Дияр Нұрғожайдың табысы да белгілі болды.
Лас-Вегаста өткен турнирдің басты жекпе-жегі BMF титулы үшін өтті. Бұл кездесуде бразилиялық Чарльз Оливейра америкалық Макс Холлоуэйді жеңіп, чемпиондық белбеуді иеленді. Бес раундқа созылған жекпе-жек барысында Оливейра қарсыласынан басым түсіп, төрешілер шешімімен жеңіске жетті.
Қазақстандық Дияр Нұрғожай да осы турнирде жеңіске жетіп, UFC ұйымындағы алғашқы жеңісін тіркеді. Дереккөздің мәліметіне сәйкес, қазақстандық файтер бұл жекпе-жек үшін 56 мың доллар табыс тапқан. Оның 26 мың доллары октагонға шыққаны үшін төленсе, тағы 26 мың доллар жеңісі үшін берілген. Сонымен қатар 4 мың доллар көлемінде демеушілік бонус алған. Нұрғожайдың қарсыласы Тобиас Харила 16 мың доллар алған: оның 12 мыңы жекпе-жекке қатысқаны үшін, ал 4 мыңы демеушілерден берілген төлем болған.
Турнирдегі ең жоғары гонорар басты жекпе-жекке қатысқан файтерлерге бұйырды. Sporty Salaries деректеріне сәйкес, Чарльз Оливейра шамамен 2,28 миллион доллар тапқан, ал оның қарсыласы Макс Холлоуэй шамамен 1,54 миллион доллар алған. Сонымен қатар «Кештің үздік өнер көрсетуі» үшін 100 мың доллар көлеміндегі бонус Родолфо Беллато, Альберто Монтес, Грегори Родригес және Дрю Доберге берілді. Ал «Кештің үздік жекпе-жегі» сыйлығы бұл жолы табысталмады.
