Морозова конькимен жүгіруден әлем чемпионатында жетінші орын алды
Нидерландтың Херенвен қаласында классикалық көпсайыс бойынша конькимен жүгіруден әлем чемпионаты аяқталды, деп хабарлайды Pin-UpSport.kz. Бұл жарыста Қазақстан құрамасының намысын Надежда Морозова қорғап, турнир қорытындысы бойынша жалпы есепте жетінші орынды иеленді.
Классикалық көпсайыс бағдарламасы бірнеше қашықтықтан тұрады. Қазақстандық спортшы алдымен 500 метр қашықтықта өнер көрсетіп, үшінші нәтижені көрсетті. Кейін 3000 метрлік жарысқа қатысып, бұл дистанцияда оныншы болып мәреге жетті.
Келесі кезеңде Морозова 1500 метр қашықтықта жарысқа түсті. Бұл дистанцияда ол алтыншы орын алды. Осы нәтиженің арқасында қазақстандық спортшы 24 қатысушының ішінен үздік сегіздікке еніп, жарыстың соңғы қашықтығы — 5000 метрге қатысу құқығына ие болды.
5000 метрлік жарыста Морозова жетінші нәтиже көрсетіп, жалпы есепте де жетінші орынға тұрақтады. Оның жиынтық көрсеткіші 160.435 балл болды. Әлем чемпионы атағын норвегиялық Рагне Виклунд жеңіп алды — 157.457 балл. Екінші орын нидерландтық Марейке Груневаудқа (158.086) бұйырса, үшінші орын жапониялық Михо Такагиға (158.287) тиесілі болды. Классикалық көпсайыста жеңімпаз ең аз балл жинаған спортшы болып есептеледі.
