UFC Fight Night 268: Морено Асу Алмабаевтың орнына Каванамен кездеседі
Фото: Zuffa LLC
Мехикода өтетін UFC Fight Night 268 турнирі басты жекпе-жегін сақтап қалды, оған қазақстандық Асу Алмабаевтың жарақатына байланысты қатыса алмауы әсер етпеді, деп хабарлайды Pin-UpSport.kz.
Ұйымдастырушылар бұрынғы UFC чемпионы Брэндон Мореноға жаңа қарсылас ретінде британдық файтер Лонир Кавананы бекітті.
Алғашында дәл осы турнирдің басты оқиғасында Мореноға қарсы октагонға Асу Алмабаев шығуы тиіс еді. Алайда 3 ақпанда қазақстандық спортшы жаттығу кезіндегі спарринг барысында қолын сындырып алғаны белгілі болды. Осы жарақатқа байланысты Асу турнирден шығып қалды. Бұл жағдай UFC үшін маңызды өзгеріс саналады, себебі Мореноның жекпе-жегі кештің негізгі тартысы ретінде жоспарланған болатын.
Алмабаевтың орнына Лонир Кавана шақырылды. Қазіргі таңда британдық файтер UFC-дің ең жеңіл салмақ дәрежесінде 15-орында тұр. Айта кету керек, Кавананың 14 наурыз күні Лас-Вегаста Бруно Силваға қарсы жекпе-жегі жоспарланған еді. Соған қарамастан ол анағұрлым ауқымды сын-қатерді таңдап, Мореномен кездесуге келісті және жекпе-жекті жоспарланған мерзімнен екі апта бұрын өткізетін болды.
Басты жекпе-жек 28 ақпан күні Мехикода өтеді, ал Қазақстанда турнир 1 наурызға қараған түні көрсетіледі. Брэндон Морено дивизион рейтингінде бесінші орында тұр және чемпиондық белбеу үшін күреске қайта қосылуға ниетті. Ал Кавана үшін бұл кездесу рейтингтегі орнын жақсартып, UFC аренасында өзін дәлелдеуге үлкен мүмкіндік болмақ.
Айбар Рысдаулет
Абат Айымбетов Румынияға ауысуға жақын
Теренс Кроуфорд мансабын аяқтау себебін түсіндірді: «Бұл спортта қол жеткізбеген мақсатым қалмады»