Шавкат Рахмонов тізесіне операция жасатып, шамамен бір жылға қатардан шықты
Шавкат Рахмонов. Фото: Zuffa LLC
Қазақстандық ММА жауынгері Шавкат Рахмонов денсаулығына байланысты тағы бір күрделі сынаққа тап болды. Спортшы тізесіне операция жасатып, соның салдарынан октагонға оралу мерзімі ұзақ уақытқа шегерілді, деп хабарлайды Pin-UpSport.kz.
Алдын ала болжам бойынша, оның толық қалпына келуіне 9–10 ай қажет болуы мүмкін.
Бұл ақпаратты танымал журналист Ариэль Хельвани растады. Ол мәліметті Рахмоновтың менеджері Дэнни Рубинштейнге сілтеме жасап таратты. Дереккөздің айтуынша, операция бұрын да қиындық туғызған сол тізеге жасалған. Дәл осы жарақат Шавкаттың мансабында бір жылдан астам үзіліс жасауына себеп болған еді. Дәрігерлер бұл жолы да асығыстыққа жол бермей, толық оңалтудан өтуді ұсынған.
Жуырда Шавкат Рахмонов Алматыда өткен «Naiza FC» турниріне арнайы барып, шараға балдақпен келгені белгілі болды. Бұл жағдай жарақаттың қаншалықты күрделі екенін айқын көрсетті. Қазіргі таңда спортшының командасы нақты оралу күнін атамай, басты мақсат ретінде денсаулықты толық қалпына келтіруді алға қойып отыр.
«Номад» лақап атымен танылған қазақстандық файтер соңғы жекпе-жегін 2024 жылдың 8 желтоқсанында АҚШ-тың Невада штатындағы Парадайс қаласында өткен «UFC 310» турнирінде өткізді. Ол кездесуде ирландиялық Иэн Гэрриді төрешілердің бірауызды шешімімен жеңген болатын. Операциядан кейін Рахмонов ұзақ оңалту кезеңінен өтеді, ал оның октагонға қайта оралуы 2025 жылдың соңына қарай күтіледі.
Айбар Рысдаулет
Қазақстан шорт-тректен жасөспірімдер арасындағы әлем чемпионатында қола жүлдеге ие болды
Елена Рыбакина Australian Open жеңісінен кейін Абу-Дабидегі турнирді өткізіп алады