Қазақстан хоккейшілері Жапонияны жеңіп, Азия чемпионы атағын сақтап қалды
Фото: City-Press via Getty Images
Қазақстан құрамасы Пекиндегі 2025 жылғы Азия чемпионатының соңғы матчында Жапонияны 4:3 есебімен жеңіп, өткен жылғы чемпиондық атағын қорғап қалды, деп хабарлайды Pin-UpSport.kz. Кездесуде Роман Старченко дубль жасап, команда жеңісіне елеулі үлес қосты.
Турнирдің соңғы күніне дейін Талғат Жайлауовтың шәкірттері көшбасшылықты сақтап тұрған еді. Қытайды ұтып, ал жапондардың Оңтүстік Кореядан жеңілуі қарсыластардың мүмкіндігін барынша азайтты. Жапония бірінші орынға тек ірі есеппен жеңген жағдайда ғана үміттене алатын. Соған қарамастан, Қазақстан құрамасы ойынға барынша жауапкершілікпен кірісіп, қысқа турнирдегі үшінші жеңісін мақсат етті.
Ойын қарқынды басталып, алтыншы минутта Кирилл Ляпунов есеп ашты. Бірінші кезеңнің басым бөлігінде қазақстандықтар ойын тізгінін ұстап, бірнеше қауіпті мүмкіндік жасады. Алайда кезеңнің соңында Мадока Сузуки таразы басын теңестірді. Екінші кезеңде команданың капитаны Роман Старченко алға шықты: алдымен шебер соққымен қақпаның тоғыздығын дәл көздеді, кейіннен қайтарылған шайбаны қақпаға бағыттап дубль жасады. Осы аралықта Ю Сато мен Александр Борисевич те бір-бірден шайба салды. Кездесу 4:2 есебімен үшінші кезеңге өтті. Соңғы жиырма минутта жапондар шабуылды күшейтіп, 56-минутта Окубо есепті қысқартты. Қақпашыны ауыстырған соң, жапондар толық шабуылға көшті.
Матчтың соңғы минуттары қазақстандық қорғаныс үшін ауыр сынақ болды. Қарсыластың қарқынынан кейін де команда берілмей, есепті сақтап қалды. Финалдық сирена Қазақстан құрамасының Азия чемпионы атағын екінші рет қатарынан қорғағанын растады. Күміс пен қола жүлделер Қытай мен Оңтүстік Корея арасындағы соңғы матчта анықталды.
Айбар Рысдаулет
Рахмонов Дохадағы жеңістен кейін Иэн Гэрриге үн қатты
Рыбакина мен Фис 2025 жылғы Әлемдік теннис лигасына қатыспайды