Дамир Исмағұлов Karate Combat лигасында нокаутпен жеңіске жетті
Дамир Исмагулов. Фото: Zuffa LLC
Қазақстандық файтер Дамир Исмағұлов Karate Combat ұйымындағы алғашқы жекпе-жегін айқын жеңіспен бастады, деп хабарлайды Pin-UpSport.kz. Майами (АҚШ) қаласында өткен Karate Combat 57 турнирінде ол америкалық Тайлер Хиллмен кездесіп, бірінші раундта нокаутпен жеңді.
Жекпе-жек небәрі екі минутқа созылды. Исмағұлов қарсыласына бірнеше дәл соққы жасап, жекпе-жекті уақытынан бұрын аяқтады. Бұл оның UFC-дегі мансабынан кейінгі алғашқы ресми айқасы болды. Karate Combat ұйымының ресми парақшаларында жекпе-жектің нокаут сәті жарияланды.
ММА-де Исмағұловтың рекорды — 27 жеңіс және 3 жеңіліс. Ол 2018–2023 жылдар аралығында UFC-де өнер көрсетіп, жеті кездесу өткізіп, олардың бесеуінде жеңіске жеткен. Келісімшарт мерзімі аяқталған соң, спортшы жаңа кезең бастап, Karate Combat ұйымына ауысқан болатын.
Karate Combat — 2018 жылы Дубайда құрылған халықаралық кәсіби лига. Онда жекпе-жектер толықконтактті каратэ ережелерімен өтеді: қол және аяқ соққыларына рұқсат берілген, бірақ күрес элементтері, тұншықтыру және шынтақпен соғу әрекеттері қолданылмайды.
