Жанкүйерлер тәртіпсіздігінен кейін «Славияға» техникалық жеңіліс тіркелді
Чехия футбол лигасының тәртіптік комитеті прагалық «Славияға» «Спартамен» өткен матчтағы жанкүйерлер әрекеті үшін 0:3 есебіндегі техникалық жеңіліс берді, деп хабарлайды Pin-UpSport.kz. Оқиға чемпиондық кезең аясындағы кездесуде болды.
Екінші тур матчы 9 мамыр күні Прагадағы «Фортуна-Аренада» өтті. Ойын тоқтатылған сәтте «Славия» 3:2 есебімен алда тұрған. Екінші таймға төреші он минут қосқан еді.
Қосылған уақыттың жетінші минутында алаң иелерінің жанкүйерлері күзет қызметкерлерінің қоршауын бұзып өтіп, алаңға жүгіріп шыққан. Олар «Спарта» футболшыларына қарай ұмтылып, қонақтар секторына пиротехника лақтырған. Осыдан кейін төреші матчты тоқтатып, командаларды киім ауыстыратын бөлмеге алып кетті. Кейін «Спарта» ойыншылары кездесуді жалғастырудан бас тартты.
Нәтижесінде «Славия» техникалық жеңілістен бөлек, он миллион чех кроны көлемінде айыппұл алды. Сонымен қатар клуб келесі төрт үй матчысын көрерменсіз өткізеді. Қазір команда Чехия чемпионатының турнирлік кестесінде 74 ұпаймен көш бастап тұр. Ал «Спартаның» еншісінде 69 ұпай бар.
